წიგნები ბათუმში

რაღაცა არსებობს. კი, აი ამ ფრაზით უნდა დავიწყო. აბა სხვას რას მოვაწერო ის რომ ამდენი წლის წუწუნის შემდეგ იმის თაობაზე რომ ბათუმში სასურველი ავტორის, სასურველი წიგნის სასურველ ფასად ყიდვა ჭირს. თვეში უკვე მესამედ მიხდება წიგნზე ან ავტორზე პოსტის წერა. ჯერ დათო ტურაშვილთან შეხვედრა იყო, შემდეგ წიგნის ბაზრობა, შემდეგ გიორგი ხასაია. ახლა უკვე ... მოკლედ რომ აგიხსნათ- ბათუმში კიდევ ერთი, ძალიან კარგი წიგნის მაღაზია გაიხსნა. თან ყველაზე კარგ ადგილზედ - ჩემი სამსახურის წინ - რისთვისაც განსაკუთრებული მადლობა იმ კეთილ ადამიანებს ვინც ეს საქმე ითავა.

თუ აქამდე მხოლოდ ბიბლუსს "ვაღმერთებდით" ქართულ მწერლობასთან ზიარების საშუალებად და შიგადაშიგ ყოფილი ტელმანის ქუჩაზე მდებარე ძველისძველ წიგნის მაღაზიასაც გავიხსენებდით - საიდანაც ძირითადად რუსულ ენოვანი წიგნები გამოგვქონდა. "წიგნები ბათუმში"  ამ ორ სეგმენტს თავის თავში აერთიანებს. რაც ძაალიან მიხარია.

მართალია სულ სამჯერ შევესწარი წიგნის მაღაზიის გახსნას და დიდი გამოცდილებით ვერ დავიკვეხნი, მაგრამ თვით "ბატონი წამყვანი" და ინტელექტუალთა არც თუ მცირერიცხოვანი "ამალა" ბათუმში რიგითი მაღაზიის გამო რომ არ ჩამოვიდოდნენ ცხადია. მაღაზიის გახსნის იდეა და ფრთაშესხმაც მათ მეგობრებს - ირაკლი ბაკურიძეს და მარი კორინთელს ეკუთვნის და სწორედ მათ კიდევ ერთხელ დიიდი მადლობა.









აბა გამოიცანით - რომელი წიგნი გადადიოდა ხელიდან ხელში და რომელ ავტორს მოეძალებოდა ამ საღამოს სლოკინი ?! თუმცა არა მხოლოდ მარტინს. აქ თითქმის ყველამ ნახა თავისი საყვარელი ავტორი და წიგნი, რომელიც ჯერ არ წაუკითხავს, ან დიდი სიამოვნებით გადაიკითხავდა. დავა იმის თაობაზე თუ რომელი ავტორი რა ჟანრში იყო ან არის უფრო ძლიერი, რომელ ნაწარმოებში სად უმუხთლა იღბალმა და სად გაუმართლა იმდენად საინტერესო იყო მოსასმენად რომ მაღაზიაში "ჩამოსაჯდომის" არარსებობა გავაპროტესტე - დიდი სიამოვნებით დავჯდებოდი და მოვუსმენდი მათ კამათს.  აი ვინც არაფერს არ აპროტესტებდა და არც დაჯდომის დაუკმაყოფილებელი სურვილი არ აწუხებდა ეს პატარა მკითხველი იყო. ეგრევე მონახეს თავიანთი ადგილები, საინტერესო წიგნებიც გადაშალეს და მალე "საბავშვო კუთხიდან" ხან ოკიანის შრიალის და ხანაც იხტიოზავრის ღრიალის ხმა გამოდიოდა.  დროდადრო რომელიღაც ბავშის - "მიდა ეეეს" ისმოდა, მაგრამ ეგ არაფერი.

ტოლკინი - წიგნი რომელიც მე აუცილებლად უნდა ვიყიდო. ეს იმ ჩამონათვალიდანაა - რომ გავიზრდები აუცილებლად ... მაგრამ გარდა რუსულ ენოვანი სეგმენტისა არანაკლებ საინტერსო იყო ქართულ ენოვანი განყოფილებაც. როგორც უკვე ვთქვი ყველამ იპოვა ის რაც სურდა, ან ის რითაც დაინტერესდა.

ბებერი რეი წლის ამ მონაკვეთში იკითხება ყველაზე გემრიელად. სხვათაშორის ვიკითხე კიდეც მართა იყო თუ არა ბაბუაწვერას ღვინო შუშის დოქში... გაინტერესებთ პასუხი? მიდით მაღაზიაში და გაიგებთ

იყო მუსიკა, ღვინოც, ტკბილეულიც, წიგნებით გახარებული ბევრი და ღვინით აღტაცებული რამოდენიმე ადამიანიც. თუმცა რაც მთავარია ყველას ძალიან უხაროდა, ძალიან ბევრი ახალი წიგნებით ხელდამშვენებულიც კი წავიდა სახლში. ძალიან ბევრი კი (ჩემსავით) მისტიურ და მითიურ თვისბოლოს ელოდება და მერე ისევ შეიგრძნობს ახალი წიგნის გადაშლისას შესუნთქულ ტიპოგრაფიის სურნელს და სულ სხვა სამყაროსკენ მიმავალი, ჯერ გაურკვეველი მაგრამ საინტერესო - პირველი აბზაცის ჩაკითხვის სიამოვნებას.

მოკლედ - წიგნის ვერ შოვნა საწუწუნოდ აღარ გვაქვს. ალელუია... რაღაც სხვა უნდა მოვიფიქროთ ...